Stjórn Neytendasamtakanna fagnar því að nú sé skipafélag að hefja strandflutninga á vörum á nýjan leik. Þó svo að vöruflutningar til og frá landsbyggðinni verði áfram að hluta til með flutningabílum, er ljóst að strandflutningar munu létta á umferðarþunga stórra flutningabíla og mun það auka öryggi á þjóðvegunum. Minnt er á að nú eru vöruflutningar með skipum innanlands skattlagðir mun meira en vöruflutningar með flutningabílum. Því fagna Neytendasamtökin að fram kemur í drögum að samgönguáætlun fyrir árin 2007-2018 að jafnræðis skuli gætt við gjaldtöku ólíkra samgöngugreina. Neytendasamtökin leggja áherslu á að þessu verði meðal annars náð með lækkun á gjaldtöku vegna vöruflutninga með skipum.