Í fyrsta tölublaði Neytendablaðsins 2008 birtu Neytendasamtökin stutta könnun um verð á leiguhúsnæði. Þar sem efnahagsástandið og ástand á fasteignamarkaði hefur gerbreyst síðan þá lék samtökunum forvitni á að vita hvernig verð á leigumarkaði hefði þróast.

Var því ákveðið að gera litla könnun með svipuðu sniði og hina fyrri. Einungis var kannað verð á leiguíbúðum á höfuðborgarsvæðinu en gera má ráð fyrir að leiguíbúðir annars staðar séu heldur ódýrari. Þá er ekki um að ræða tæmandi könnun á markaðnum heldur voru einungis skoðaðar íbúðir sem eru auglýstar til leigu hjá leiga.is og Rentus. Þá er ekki tekinn með í reikninginn kostnaður sem kann að skapast vegna rafmagns eða hússjóðs, heldur einungis leiguverðið sjálft. Ekki var heldur tekið tillit til þess hvort einhver húsbúnaður fylgdi með í leigunni.

							Lækkun meðalverðs
	Meðalstærð	Meðalverð	Meðalverð í apríl 2008	Hæsta verð	Lægsta verð	Fjöldi íbúða í könnun	Í prósentum	Í krónum
Stúdíó	38 fm.	80.363	91.313	100.000	40.000	11	12%	10.950
2 herbergja	65 fm.	110.988	119.574	160.000	80.000	41	7,2%	8.586
3 herbergja	88 fm.	132.225	140.674	240.000	85.000	49	6,0%	8.449
4 herbergja	117 fm.	148.857	169.500	200.000	110.000	35	12,2%	20.643
5 herbergja	161 fm.	186.731	229.000	350.000	120.000	26	18,5%	42.269

Eins og sjá má af töflunni hefur leiguverð lækkað talsvert, eða um allt að 18,5% vegna leigu á stærri eignum. Þó má gera ráð fyrir að raunveruleg lækkun sé umtalsvert meiri, enda gera flestir leigusamningar ráð fyrir því að leiguverð breytist með tilliti til neysluvísitölu, en hún hefur hækkað um 18% á árinu 2008. Því má reikna með því að leiga vegna þeirra íbúða sem fóru í langtímaútleigu á uppsettu verði í apríl sl. sé allt að þriðjungi hærri en hægt er að leigja sams konar íbúð á í dag.

Að endingu er vert að taka fram að Neytendasamtökin, sem þó fá fjölda erinda og fyrirspurna vegna húsaleigumála, eru ekki leigjendasamtök enda sjaldnast um neytendaviðskipti að ræða. Engin leigjendasamtök eru starfandi eins og er. Neytendasamtökin hafa ítrekað farið fram á það við félags- og tryggingamálaráðuneyti að úr þessu verði bætt en hafa enn sem komið er ekki fengið viðbrögð sem skyldi.