1. KAFLI

1. gr.
Nafn samtakanna er Neytendasamtökin. Heimili og varnarþing er í Reykjavík. Neytendasamtökin eru hagsmunasamtök neytenda á Íslandi. Neytendasamtökin eru sjálfstæð og óháð einstaklingum, félögum, fyrirtækjum, samtökum, stjórnmálaflokkum og opinberum aðilum. Neytendasamtökin skulu ætíð taka afstöðu til mála í samræmi við hagsmuni neytenda óháð öðrum sjónarmiðum.
2. gr.
Tilgangur Neytendasamtakanna er að gæta hagsmuna neytenda í þjóðfélaginu. Tilgangi sínum hyggjast samtökin ná meðal annars með því: 

• að vinna að því að sjónarmið neytenda séu virt þegar ákvarðanir eru teknar eða reglur settar er varða hagsmuni neytenda, 
• að annast útgáfu-, rannsóknar-, ráðgjafa- og fræðslustarfsemi til þess að auka skilning á hagsmunamálum neytenda, þar á meðal að auka verð-      og vöruþekkingu þeirra, 
• að styðja réttmætar kröfur einstakra neytenda og berjast fyrir því að réttur neytenda sé virtur, 
• að vinna að umbótum á löggjöf til hagsbóta fyrir neytendur.

3. gr.
Allir þeir sem orðnir eru 18 ára geta orðið félagar í Neytendasamtökunum og notið fullra réttinda séu þeir skuldlausir við samtökin.
4. gr.
Einstök neytendafélög geta tekið upp skipulagstengsl við Neytendasamtökin, enda séu lög þeirra í samræmi við lög Neytendasamtakanna. Neytendasamtökin og viðkomandi félag skulu þá gera með sér samstarfssamning.
5. gr.
Félög eða samtök geta gerst stuðningsaðilar Neytendasamtakanna enda skuldbindi þau sig til að vinna að hagsmunamálum neytenda. Óski félag eða samtök eftir stuðningsaðild þarf samþykki stjórnar Neytendasamtakanna. Sé stuðningsaðild samþykkt skal stjórn Neytendasamtakanna gera sérstakt samkomulag um það með hvaða hætti stuðningsaðildin skuli vera.

2. KAFLI - Þing Neytendasamtakanna

6. gr.
Þing Neytendasamtakanna skal haldið annaðhvort ár í septembermánuði. Kjörtímabil stjórnar er milli þinga. Þing Neytendasamtakanna er æðsta vald í málefnum þeirra. Aukaþing getur stjórnin haldið þau ár sem reglulegt þing er ekki haldið. Til þings og aukaþings skal boðað með a.m.k. mánaðar fyrirvara með auglýsingu í dagblöðum.
7. gr.
Allir skuldlausir félagar Neytendasamtakanna geta verið þingfulltrúar á þingi samtakanna enda tilkynni þeir þáttöku með a.m.k. viku fyrirvara. Stjórn samtakanna er heimilt að samþykkja nýja þingfulltrúa fram að þingbyrjun og þarf þá samþykki 2/3 hluta þeirra stjórnarmanna sem atkvæði greiða um málið. Stjórn Neytendasamtakanna skal stuðla að lágmarksþátttöku úr hverjum landshluta á þingið.
8. gr.
Þing Neytendasamtakanna er lögmætt ef löglega er til þess boðað. Þing Neytendasamtakanna skal ræða og álykta um málefni Neytendasamtakanna og almenn neytendamál. Á reglulegu þingi skal gerð grein fyrir starfsemi samtakanna frá síðasta þingi og rætt og ályktað um starfsemi þeirra næstu starfsár. Endurskoðaðir reikningar samtakanna skulu lagðir fram. Skulu tveir skoðunarmenn reikninga og tveir til vara kjörnir á þingi úr hópi annarra en stjórnarmanna og starfsmanna.
9. gr.
Dagskrá þings samtakanna skal vera: 

1. Þingsetning. 
2. Kjör þingforseta og annarra embættismanna. 
3. Skýrsla stjórnar og starfsnefnda. 
4. Endurskoðaðir reikningar lagðir fram til afgreiðslu og samþykktar. 
5. Lagabreytingar. 
6. Lýst kjöri formanns. 
7. Kosning annarra stjórnarmanna 
8. Kjör tveggja skoðunarmanna reikninga og tveggja til vara. 
9. Ný stjórn tekur við. 
10. Önnur mál.

Þingi er heimilt að breyta röð dagskrárliða, þó þannig að kjör stjórnar og trúnaðarmanna má ekki færa framar í dagskránni.
10. gr.
Þingið úrskurðar sjálft um kjörgengi þingfulltrúa og kjörbréf þeirra sbr. 3. gr. og 7. gr. Einfaldur meirihluti ræður úrslitum á þinginu sbr. þó 17. gr.

3. KAFLI - Stjórn Neytendasamtakanna

11.gr.
Stjórn Neytendasamtakanna er skipuð 21 stjórnarmanni. Formaður er kjörinn sérstaklega í almennri kosningu allra félaga samtakanna en aðrir stjórnarmenn á þingi samtakanna.
12. gr.
Framboð til formanns skulu berast stjórn Neytendasamtakanna eigi síðar en fyrir lok febrúar þess árs sem reglulegt þing er haldið. Framboði til formanns skulu fylgja meðmæli 25 skuldlausra félagsmanna hið fæsta en 50 skuldlausra félagsmanna hið flesta. Berist framboð til formanns innan tilskilins frests en á því eru gallar skal frambjóðanda veittur viku frestur til að lagfæra þá ágalla sem kunna að vera á framboði hans. Berist einungis eitt framboð til formanns er formaður sjálfkjörinn en berist fleiri framboð til formanns annast stjórn um kynningu frambjóðenda og hlutast til um að kjörseðlar séu sendir öllum skuldlausum félögum samtakanna eigi síðar en í aprílbyrjun það ár sem reglulegt þing er haldið. Kosningin er bréfleg og/eða með tölvutækni sé þess kostur og skal lokið fyrir lok maí sama ár og skal þess rækilega getið á kjörseðlum og í auglýsingum. Í öllum tilvikum skal gætt nafnleyndar kjósanda.
Frambjóðandi til formanns skal hafa aðgang að félagsskrá samtakanna frá því að hann skilar inn gildu framboði og nauðsynlegum gögnum varðandi samtökin svo sem bókhaldsgögnum og ársreikningum. Stjórn Neytendasamtakanna skal auglýsa opinberlega framboð til formanns mánuði fyrir lok framboðsfrests.
13. gr.
Stjórn Neytendasamtakanna kýs 3. manna uppstillinganefnd eigi síðar en í janúar það ár sem að reglulegt þing er haldið. Stjórn Neytendasamtakanna setur reglur fyrir uppstillinganefnd þar sem kveðið er nánar á um framkvæmd kosninga. Hlutverk uppstillinganefndar er að setja síðan nánari reglur um formannskjör þegar það fer fram, fylgjast með auglýsingum og framkvæmd formannskjörs og annast um talningu atkvæða ásamt fulltrúum frambjóðenda og að öðru leyti gegna hlutverki kjörstjórnar við formannskjör. Að loknu formannskjöri skal uppstillinganefnd gera tillögur um næstu stjórn samtakanna og skal nýkjörinn formaður þá starfa með nefndinni. Við uppstillingu til stjórnar skal gætt svo sem unnt er jafnræðis milli landshluta. Tillögur uppstillinganefndar um skipan stjórnar skulu liggja fyrir ekki síðar en hálfum mánuði fyrir þingbyrjun. Tillögur um stjórnarmenn má setja fram áður en kjör stjórnar er tekið á dagskrá þings Neytendasamtakanna.
14.gr.
Þing Neytendasamtakanna kýs 20 stjórnarmenn samtakanna. Kosning til stjórnar skal vera bundin og skrifleg. Stjórn Neytendasamtakanna kýs úr sínum hópi varaformann, ritara og gjaldkera.
15.gr.
Stjórnarfundi skal halda eigi sjaldnar en fjórum sinnum á ári í janúar, maí, september og nóvember. Krefjist einn stjórnarmaður að stjórnarfundur sé haldinn skal gera það innan hálfs mánaðar frá því að krafa um stjórnarfund barst. Á stjórnarfundum skal gera grein fyrir starfseminni frá því að síðasti stjórnarfundur var haldinn og fjárhagslegri stöðu samtakanna. Meginverkefni stjórnarfunda er að öðru leyti að móta stefnu samtakanna fyrir næsta tímabil.
16. gr.
Allir skuldlausir félagar í Neytendasamtökunum hafa kosningarétt og kjörgengi í formanns og stjórnarkjöri en þeir einir geta neytt atkvæðaréttar síns í stjórnarkjöri á þingi samtakanna sem eru þingfulltrúar á þingi Neytendasamtakanna.
17.gr.
Formaður, varaformaður, ritari og gjaldkeri skipa framkvæmdastjórn auk 3 annarra stjórnarmanna kjörnum af stjórn Neytendasamtakanna. Formaður stjórnar fundum framkvæmdastjórnar. Hlutverk framkvæmdastjórnar er að taka ákvarðanir um allt sem snertir rekstur samtakanna og taka afstöðu til mála sem samtökunum berast. Fundir skulu haldnir reglulega og innan viku krefjist einn framkvæmdastjórnarmaður þess að fundur verið haldinn. Framkvæmdastjórn tekur ákvarðanir um starfsmannahald og skipulag starfseminnar og annast um ráðningu starfsmanna í samráði við framkvæmdastjóra samtakanna.

4. Kafli - Reikningskil og lagabreytingar

18. gr.
Reikningstímabil Neytendasamtakanna er almanaksárið. Árgjöld skulu ákveðin af stjórn Neytendasamtakanna og taka samtökin einnig við styrkjum, t.d. frá opinberum aðilum.
19. gr.
Lögum þessum má breyta á reglulegu þingi Neytendasamtakanna og þarf 2/3 hluta greiddra atkvæða til að breytingin nái fram að ganga. Lagabreytingartillögur þarf að leggja fram eigi síðar en 15. ágúst það ár sem reglulegt þing er haldið. Lagabreytingartillögur sem stjórn Neytendasamtakanna leggur fram þarf að kynna eigi síðar en þing er auglýst.

Lög þessi voru samþykkt á þingi Neytendasamtakanna 27. - 28. september 2002.