Félagsmenn og stjórn:
Allir sem eru orðnir 16 ára geta orðið félagar í NS og notið fullra félagslegra réttinda. Neytendasamtökin byggjast á einstaklingsbundinni aðild en félög og samtök geta gerst stuðningsaðilar skuldbindi þau sig til að vinna að málefnum neytenda. Þarf stjórn NS að samþykkja slíka aðild og gera sérstakt samkomulag um hvernig henni skuli vera háttað.
Stjórn NS er skipuð 21 manni og kosin á þingi samtakanna sem haldið er annað hvort ár. Allir skuldlausir félagsmenn hafa rétt til að sitja þingið. Formaður og varaformaður eru kosnir sérstaklega
Fulltrúaráð Neytendasamtakanna
Miðað er við að fulltrúaráðið haldi minnst einn fund það ár sem þing er haldið, en tvisvar það ár sem þing er ekki haldið.
Rétt til setu í fulltrúaráðinu hafa allir skuldlausir félagsmenn Neytendasamtakanna.
Opnar nefndir
Stjórn Neytendasamtakanna hefur sett á fót nokkrar nefndir um mál sem skipta neytendur miklu. Allir áhugasamir félagsmenn sem hafa áhuga á að starfa í þessum nefndum geta gengið í þær
Málasvið nefndanna eru:
· Staðlar, öryggi neysluvöru og öryggi í umferðinni
· Samkeppni, fákeppni og einokun og áhrif þessa á verð og framboð til neytenda
· Opinber þjónusta, þar á meðal heilbrigðisþjónusta
· Nauðsynlegar nýjungar og breytingar á neytendalöggjöf
· Kynning á Neytendasamtökunum og öflun nýrra félaga
· Matvæli, umhverfismál og siðræn neysla
· Neytendafræðsla, fjármál heimila og ungir neytendur
Fjármögnun
Framlög hins opinbera hér á landi duga ekki til að standa undir kostnaði vegna upplýsinga- og kvörtunarþjónustu Neytendasamtakanna. Lítill stuðingur opinberra aðila hefur hamlað starfsemi NS en mikill fjöldi félagsmanna gerir það mögulegt að sinna brýnustu neytendamálum. Þetta er ólíkt því sem gerist í nágrannalöndum eins og sést á yfirliti hér að neðan.
Rekstrarfé Neytendasamtakanna:
· 60% eru félagsgjöld.
· 17% eru tekjur af útgáfustarfsemi.
· 15% eru framlag ríkisins.
· 2% eru framlög sveitarfélaga, aðallega Reykjavíkurborgar .
· 2% eru framlög stéttarfélaga
· 4% eru tekjur af öðrum verkefnum.
Til samanburðar erlendis
· Í nágrannalöndum er rekstur sambærilegra neytendasamtaka að mestu leyti kostaður af opinberum aðilum.
· Stjórnvöld í Danmörku og Noregi hafa greitt um 80% af rekstrarkostnaði neytendasamtaka þar og finnsk stjórnvöld um 90%.
· Samt rekur hið opinbera samhliða öflugar neytendastofnanir í þessum löndum.
· Bæjar- og sveitarstjórnir reka auk þess kvörtunar- og upplýsingaskrifstofur fyrir neytendur.
· Einnig eru þar starfrækt embætti umboðsmanna neytenda.
Eru Neytendasamtökin pólitísk?
· NS taka ekki afstöðu til stjórnmálaflokka eða stjórnmálastefna og eru því ekki flokkspólitísk.
· NS taka afstöðu til þeirra þjóðmála sem varða neytendur og eru því pólitísk í þeim skilningi - neytendapólitísk.
· NS láta sig miklu varða þau þjóðmál sem ráða hag neytenda - en taka afstöðu til málefna óháð stefnu eða afstöðu annarra. NS geta verið andvíg eða sammála sjónarmiðum sem stjórnmálaflokkar setja fram í einstökum málum, en það er þá eingöngu á grundvelli þess eða þeirra ákveðnu mála sem um er að ræða í þeim tilvikum. Innan NS og í stjórn þeirra starfar fólk úr mismunandi stjórnmálaflokkum sem og óflokksbundið. Til formennsku í NS hefur valist fólk úr flestum flokkum og fólk sem er ekki í nokkrum flokki.
