Jóhannesi þakkað eftir áratugi í forystu

Á þingi Neytendasamtakanna um liðna helgi urðu formannsskipti hjá Neytendasamtökunum. Jóhannes Gunnarsson lét af störfum eftir 34 ára starf í þágu samtakanna. Jóhannes tók fyrst við sem varaformaður samtakanna árið 1982, varð formaður þeirra tveimur árum síðar og gegndi því embætti samfellt í 32 ár, að undanskildum tveimur árum þegar hann var framkvæmdastjóri samtakanna. Þannig var Jóhannes formaður samtakanna í alls 30 ár á þessu 34 ára tímabili. Frá 1990 var Jóhannes í föstu starfi á skrifstofu Neytendasamtakanna.

Þeir eru því fáir sem hafa jafn víðtæka þekkingu á neytendamálum og Jóhannes, en hann hefur verið öflugur talsmaður neytendaverndar og neytendahagsmuna um áratuga skeið. Í formannstíð Jóhannes efldust samtökin og urðu áhrifamikil samtök á landsvísu.

Ólafur Arnarson tók við af Jóhannesi á þinginu um liðna helgi og einnig tók ný stjórn Neytendasamtakanna við störfum. Í henni eru tólf einstaklingar auk formanns og koma sjö af þeim nýir inn í stjórn.

Stjórn Neytendasamtakanna 2016 – 2018 eru því svo skipuð: 

Ólafur Arnarson, formaður
Ása Steinunn Atladóttir
Björn Þór Karlsson     
Dominique Plédel Jónsson   
Fríða Vala Ásbjörnsdóttir     
Guðni Gunnarsson      
Gunnar Alexander Ólafsson 
Katrín Þorvaldsdóttir   
Ragnar Unnarsson      
Sigurður Másson
Stefán Hrafn Jónsson  
Stella Hrönn Jóhannsdóttir   
Þórey S. Þórisdóttir.
 

Á meðfylgjandi mynd má sjá Ólaf Klemensson, sem lengi hafði starfað með Jóhannesi í stjórn Neytendasamtakanna, afhenda honum blómvönd frá starfsmönnum og fráfarandi stjórn samtakanna á þingi Neytendasamtakanna um síðustu helgi. Ólafur hafði skömmu áður flutt stutta ræðu til heiðurs Jóhannesi þar sem Jóhannesi var þakkað fyrir störf sín í þágu neytenda.