Ályktanir stjórnar Neytendasamtakanna

Stjórn Neytendasamtakanna sendir frá sér tvær ályktanir eftir stjórnarfund 2. apríl 2020.

Stjórnvöld verða að tryggja varnir neytenda í tengslum við kórónuveirufaraldurinn. Aðgerðir stjórnvalda mega aldrei verða til þess að veikja varnir neytenda né réttindi.
Stjórn Neytendasamtakanna gera þá kröfu um að aðgerðir stjórnvalda í þágu fyrirtækja gangi að fullu áfram til neytenda. Neytendasamtökin krefjast þess sérstaklega að tilslakanir stjórnvalda í garð banka og fjármálastofnana skili sér að fullu til viðskiptavina þeirra í formi þóknana- og vaxtalækkana, og eins að leigjendur fái að njóta tilslakana sem leigusalar kunna að fá. Samtökin hvetja stjórnvöld til að fylgjast sérstaklega með því og fylgja því hart eftir.
Stjórn Neytendasamtakanna vilja sérstaklega vara við gamalkunnum óvildargestum, gengissigi og verðbólgu sem glittir í við sjónarrönd og hvetja stjórnvöld til að gera allt sem í þeirra valdi stendur til að stugga við þeim. Eitt af því sem hlýtur að vera skoðað við þær aðstæður er hvort setja eigi þak á verðtryggingu.
Ekki er í boði að neytendur verði einir látnir bera þær klyfjar sem óneitanlega munu fylgja því sem fram undan er.

—

Stjórn Neytendasamtakanna hvetur Strætó BS til endurskoða ákvörðun sína um að fækka ferðum almenningsvagna. Hin skerta þjónusta Strætó kemur hart niður á notendum, meðal annars þeim sem vinna samfélagslega mikilvæg störf og nýta sér almenningssamgöngur í og úr vinnu. Mætti leiða að því rökum að með fækkun ferða ferðist fleiri með hverjum vagni með aukinni smithættu, þvert á rök Strætó um aðgerðir vegna Covid-19.
Aðgengi að góðum almenningssamgöngum eru afar mikilvægar og á meðan þess er ekki beinlíns krafist af heilbrigðisyfirvöldum er óþarfi að fækka þeim.

Deildu þessu!