Fréttir

Ertu að kaupa á netinu? þetta þarftu að vita

Þú mátt skila og fá endurgreitt 

Ef þú kaupir vöru á netinu sem þér líkar ekki máttu skila henni og fá endurgreitt. Þetta gildir líka þótt varan sé útsölu eða tilboði. Þú hefur 14 daga til að láta seljanda vita að þú viljir hætta við kaupin og best er að gera það skriflega, svo sem í tölvupósti. Almennt er seljendum ekki skylt að taka við ógölluðum vörum og endurgreiða en við kaup á netinu er tekið tillit til þess að þú hefur ekki haft tækifæri til að skoða vöruna með eigin augum, prófa hana eða máta.  

Þú þarft að skila vörunni hratt og örugglega til seljanda og þarft allajafna að greiða sendingarkostnaðinn. Seljanda ber hins vegar að endurgreiða þér andvirði vörunnar auk kostnaðs við að senda vöruna til þín. Þér ber engin skylda til að taka við inneignarnótu. 

Seljandi á að upplýsa þig um þennan skilarétt og ef hann gerir það ekki lengist skilarétturinn um heilt ár. 

Þessi ríki réttur til að skila ógallaðri vöru gildir þó ekki um öll kaup, svo sem; flugmiða, pakkaferðir, mat, bílaleigur, sérpantanir og vörur þar sem innsigli hefur verið rofið. Þá gildir hann ekki ef verð vörunnar er lægra en 7.045 kr. 

Seljandi á að veita upplýsingar 

Seljandi hefur ríka skyldu til að upplýsa þig um flest allt sem máli skiptir, svo sem um eiginleika vörunnar, heildarverð, rétt til að skila vörunni, afhendingartíma og hvert og hvernig þú getur kvartað. Seljandi á einnig að gefa upp nafn fyrirtækis, netfang, símanúmer og heimilisfang.  

Viðbótarkostnaður 

Þegar vörur eru keyptar frá útlöndum getur bæst við töluverður kostnaður, svo sem sendingarkostnaður, umsýslugjald og virðisaukaskattur. Sumir seljendur setja þennan kostnað inn strax við kaup en á því er allur gangur. Hægt er að sjá hvaða kostnaður leggst á erlendar sendingar á vef Íslandspósts og Skattsins.   

Svikasíður 

Það er ekki alltaf auðvelt að sjá í gegnum svikastarfsemi en þó eru nokkur atriði sem mikilvægt er að skoða áður en þú greiðir fyrir vöruna. Nafn seljanda, heimilisfang, tengiliðaupplýsingar og skilmálar eiga að koma skýrt fram. Ef farið er fram á millifærslu í stað viðurkenndrar greiðslu eins og kreditkorts eða PayPal er rétt að hafa varann á. Þá má benda á vefsíður eins og Scamadvisor.com sem meta hvort einstaka netverslunum sé treystandi.  

Erlend netverslun 

Sömu lög gilda um netverslun á öllu evrópska efnahagssvæðinu (EES). Það þýðir að þú átt sama rétt hvort sem þú kaupir í gegnum íslenskan söluvef eða evrópskan. Ef þú lendir í deilum við seljanda innan EES getur þú leitað til Evrópsku neytendaaðstoðarinnar ecc.is.  

Ef seljandi neitar? 

Ef þú lendir í vandræðum vegna netkaupa getur þú leitað til Neytendasamtakanna. Fyrsta skref er þó alltaf að kvarta beint við seljanda. 

Sjá ítarlegri upplýsingar um netkaup hér

Fréttir í sama dúr

Ósanngjarnar kröfur Isavia vegna Base Parking

Arðsemisþak á raforku til heimila

Bannað að auglýsa dýr lán

Þetta þarftu að vita um Temu

Tímamótadómur EFTA-dómstólsins

Neytendablaðið komið út

Takk fyrir áhugann!

 Þetta vefsvæði er kostað af árgjöldum félaga í Neytendasamtökunum.

Ef þú ert ekki þegar í samtökunum biðjum við þig að íhuga að ganga í þau. Árgjaldið er 7.900 kr.