Smáforritið Kemiluppen

Danska smáforritið Kemiluppen hjálpar neytendum að forðast óæskileg efni í snyrti- og húðvörum. Dönsku neytendasamtökin Forbrugerrådet Tænk reka sérstakt verkefni  sem kallast Tænk Kemi en það miðar að því að fræða neytendur um skaðleg efni í neysluvörum.

Tænk Kemi hefur búið til merkingarkerfi með bókstöfunum A, B og C, sem segja til um hversu mikið af óæskilegum efnum er í snyrti- og húðvörum. Horft er til efna sem annað hvort er vitað með vissu – eða grunur leikur á – að séu hormónaraskandi, ofnæmisvaldandi, krabbameinsvaldandi eða skaðleg umhverfinu. A merkir að varan innheldur engin óæskileg efni, B þýðir að varan er að mestu laus við óæskileg efni en inniheldur eitt eða fleiri ilmefni og C merkir að varan innheldur eitt eða fleiri efni sem rétt væri að forðast. Efnin skapa ekki endilega hættu ein og sér en samanlögð notkun þeirra yfir tíma getur haft neikvæð áhrif og er þá gjarnan talað um svokölluð kokteiláhrif.

Smáforritið er handhægt því einfalt er að skanna strikamerki vörunnar  með farsíma og þá birtast á skjánum upplýsingar um það hvort varan flokkast sem A, B eða C.

Þar sem markaðurinn með snyrti- og húðvörur hérlendis er mjög líkur þeim danska eru væntanlega flestar vörur hérlendis nú þegar í gagnagrunni Kemiluppen. Í dag eru alls 20.000 vörur í Kemiluppen en það kom út árið 2015. Tænk Kemi hefur að beiðni Neytendsamtakanna opnað á möguleika íslenskra neytenda til að hlaða smáforritinu niður og nýta við innkaupin.

Hægt er að finna kemiluppen á Google Play og App Store sem og á kemiluppen.dk