Slysatrygging launþega

Flestir launþegar á Íslandi eru slysatryggðir samkvæmt kjarasamningum.

Tryggingin gildir ef starfsmaður slasast í vinnu eða á ferð til og frá vinnu. Sumar tryggingar gilda allan sólarhringinn, óháð því hvort slys verður í vinnu eða ekki. Vinnuveitandi kaupir trygginguna og greiðir iðgjald hennar.

Tegund tjóns og bætur

Óvinnufærni

– Dagpeningar á meðan þú getur ekki unnið

Varanleg örorka

– Bætur ef þú verður fyrir varanlegum skaða

Dánarbætur

– Greiddar til maka/aðstandenda ef slysið leiðir til andláts

Skilgreining á slysi

Slys er skyndilegt og utanaðkomandi atvik sem veldur meiðslum. Starfsmaður þarf að sýna fram á að um „slys“ hafi verið að ræða og að slysið hafi valdið tjóni. Meiðsli sem rekja má til álags eða innri veikleika falla ekki undir slysahugtakið. Oft er deilt um það hvort um sé að ræða slys í skilningi laga og almennt er það starfsmaðurinn sem þarf að sýna fram á að svo sé.

Orsakatengsl og sönnun

Jafnvel þótt fyrir liggi að slys hafi átt sér stað þarf starfsmaður líka að sanna að meiðslin séu til komin vegna slyssins. Ef einkenni voru til staðar fyrir slysið, og ekki liggja fyrir læknisfræðileg gögn sem tengja þau við slysið, getur kröfu hans verið hafnað.

Dæmi: Ekki var um það deilt að starfsmaður hefði orðið fyrir slysi við vinnu þegar hann fékk þungt högg á mjöðm. Starfsmaðurinn fann fyrir ýmsum alvarlegum einkennum, bæði líkamlegum og andlegum, sem hann taldi að rekja mætti til slyssins. Af læknisfræðilegum gögnum mátti hins vegar ráða að einkenni hafi verið til staðar fyrir slysið þó þau hefðu breyst og aukist. Ekki lágu fyrir nefndinni gögn á borð við matsgerð sem sýndu fram á orsakatengsl milli slyssins og einkenna eða versnunar einkenna mannsins. Taldi nefndin því ekki sýnt fram á orsakatengsl og var kröfu mannsins um bætur þar af leiðandi hafnað.

Úrskurðarnefnd í vátryggingamálum 345/2023

Stórkostlegt gáleysi

Ef starfsmaður sýnir af sér stórkostlegt gáleysi sem leiðir til slyss, getur tryggingafélag skert bætur í heild eða að hluta. Það er tryggingafélagið sem þarf að sýna fram á stórkostlegt gáleysi.

Mikilvægir frestir

Tilkynningarfrestur 1 ár
Tilkynna þarf um slys innan árs frá því að varanlegar afleiðingar koma í ljós..
Málskotsfrestur 1 ár
Ef tryggingafélagið hafnar kröfunni eða lækkar bætur hefur starfsmaður eitt ár til að leita til úrskurðarnefndar í vátryggingamálum eða stefna félaginu fyrir dóm.
Matsfrestur 3 ár
Örorka þarf að vera metin innan þriggja ára frá slysdegi, nema tryggingafélag fallist á að framlengja þann frest.