Pakkaferð er samsettur pakki sem inniheldur allavega tvö atriði af eftirtöldu: flutning, gistingu eða aðra þjónustu við ferðamenn sem tekur til verulegs hluta ferðarinnar. Þá er það skilgreiningaratriði að þjónustan taki til allavega 24 klukkustunda eða að í henni felist gisting.
Dæmigerð sólarlandaferð sem keypt er í einum pakka (iðulega flug og gisting og jafnvel hálft eða fullt fæði) telst því t.a.m. vera pakkaferð.
Um pakkaferðir gilda sérstök lög sem Neytendastofa hefur eftirlit með. Lögin byggja á sérstakri Evróputilskipun um pakkaferðir, sem var sett í þeim tilgangi að samræma reglur aðildarríkjanna um pakkaferðir, og má því ætla að réttindi neytenda við kaup á pakkaferð séu sambærileg í öllum aðildarríkjum EES.
Ferðamönnum er m.a. tryggð ýmis vanefndaúrræði ef ferðin er ekki eins og um var samið en gott er að hafa í huga að hafi neytendur eitthvað við framkvæmd pakkaferðar að athuga er ákaflega mikilvægt að kvarta strax við fararstjóra eða ferðasala.
