- bágborinn barnamatur, boð, bönn og brask
Nýtt Neytendablað er nú á leið til félagsmanna, fullt af fjölbreyttum fréttum og umræðu um neytendamál.
Meðal annars er greint frá áhugaverðum rannsóknum á barnamat sem systursamtök okkar í Noregi og Bretlandi stóðu fyrir. Þar kemur meðal annars fram að úrvalið af tilbúnum barnamat í verslunum er mikið en gæðin ekki alltaf eftir því. Barnamatur er gjarnan alltof sætur, of maukaður og næringarsnauður. Ekkert bendir til annars en að staðan sé eins hér á landi.
Tímamótalög hafa verið sett í Noregi, því bannað verður að beina markaðssetningu á óhollustu að börnum yngri en 18 ára. Að sama skapi hafa Norðmenn lagt blátt bann við sölu á koffíndrykkjum til yngri en 16 ára.
Skaðleg efni er því miður gjarnan að finna í algengum neysluvörum, líka vörum ætluðum börnum. Opinber vottun eins og norræni Svanurinn hjálpar neytendum að velja vörur sem framleiddar eru á eins umhverfisvænan hátt og hægt er. Í blaðinu er viðtal við framkvæmdastjóra Svansins á Íslandi.
Í haustútgáfu Neytendablaðsins 2025 er einnig fjallað um bílastæðabraskið, smjaðrandi gervigreind, túnfisk, hótelstjörnur, falsumsagnir, svikastarfsemi á Booking og margt fleira.
Neytendablaðið er sent öllum félögum Neytendasamtakanna. Hægt er að gerast félagi hér.
Þá er hægt að gerast hollvinur samtakanna hér.
