Fréttir

Útboðsgjald hækkar – neytendur borga brúsann

Neytendasamtökin lögðust alfarið gegn breytingum á úthlutun tollkvóta sem Alþingi samþykkti fyrir jól. Horfið var frá rúmlega ársgömlu fyrirkomulagi svokallaðs jafnvægisútboðs og gamla útboðskerfið tekið upp aftur. Að sögn stjórnvalda voru þessar breytingar gerðar til að mæta tekjutapi matvælaframleiðenda vegna minnkandi eftirspurnar í kórónaveirufaraldrinum. Þegar jafnvægisútboði var hins vegar komið á fyrir einu ári síðan var markmiðið að sögn sjávarútvegs- og landbúnaðarráðherra að auka vöruúrval, lækka vöruverð og auka samkeppni með landbúnaðarvörur neytendum til hagsbóta.

Var fyrirséð að þessar breytingar myndu hækka verð á ákveðnum tegundum innfluttra landbúnaðarvara og nú hefur komið á daginn að sú er einmitt raunin. Þannig hækkaði tollkvóti á öllum vöruflokkum nema á ostum og í sumum tilfellum hefur verð margfaldast, svo sem á þurrkuðum og reyktum skinkum. Hærra útboðsverð mun því leiða til hærra matvælaverðs eins og varað hafði verið við.

Neytendasamtökin furða sig á þessu máli öllu saman og lýsa yfir vonbrigðum með að stjórnvöld hafi tekið meðvitaða ákvörðun um að hækka matarverð með þessum hætti. Neytendur eiga rétt á fjölbreyttu vöruúrvali á sanngjörnu verði ekki síst nú þegar kreppir að. Innflutningur á tollkvótum er aðeins brot af heildarneyslunni og sú verndarhyggja sem stjórnvöld stunda fer auk þess gegn stjórnarsáttmálanum en í honum segir „Frjáls og opin alþjóðaviðskipti eru til hagsbóta fyrir lítil opin hagkerfi og auka velsæld þeirra. Leggja skal áherslu á að fjölga fríverslunarsamningum, bæði tvíhliða og í samvinnu við önnur EFTA-ríki, og að afnema viðskiptahindranir.“

Neytendasamtökin skora á stjórnvöld að hverfa frá gömlu útboðsleiðinni hið fyrsta og tryggja að innflutningur tollkvóta fari fram með jafnvægisútboði eða sé með öllu gjaldfrjáls.

Fréttir í sama dúr

Frumvarpi um samkeppnisundanþágu afurðastöðva mótmælt

Allt uppi á borðum

Áttu rétt á bótum? – sæktu þær án kostnaðar

Grænþvegnir grísir

Tjón vegna samráðs metið á 62 milljarða króna

Einbeittur síbrotavilji CC bílaleigu ehf.

Bílaleiga lykill bílhurð

Takk fyrir áhugann!

 Þetta vefsvæði er kostað af árgjöldum félaga í Neytendasamtökunum.

Ef þú ert ekki þegar í samtökunum biðjum við þig að íhuga að ganga í þau. Árgjaldið er 7.900 kr.